2016年10月14日 星期五

「烹飪小貼士」如何製作爽彈的~《魷魚蒸肉餅》(附食譜)

「烹飪小貼士」如何製作爽彈的~《魷魚蒸肉餅》(附食譜) 
http://kellyandruby-mami.blogspot.com/2016/10/blog-post.html
"蝸牛師奶"成半個月冇update Blog,哈哈哈~繼續咁龜速,就嚟升呢叫做"海參師奶"架喇~ (P.S.:海參師奶係網友Bibi幫我改架,佢話海參响海度,郁同冇郁都冇分別呀~ Wakakakaaaaaa) ~
昨日响FB Fans Page post咗"九龍吊片"玉照,九龍吊片是什麼東東芫荽蔥!? →乾魷魚是也~ 下圖的乾魷魚係响大澳買的,天然生曬,買嗰陣時佢冇咁深色,比我放响雪柜放到"被歲月洗禮"咁款,哈哈哈~再放耐D睇怕石化都似~ hahah~
《魷魚蒸肉餅》係一道非常有香港本地特色嘅家常小菜,小時候母親大人耐不耐就會煮,因為佢勁愛吃乾魷魚,不過而家嘅新晉煮婦,應該少煮呢D本土特色餸菜了......
靚嘅乾魷魚,味道係鮮香,軟硬適中,唔會有苦味,而品質差嘅乾魷魚,食落柴柴哋,仲帶有苦味>.<",想當年我都中過伏,買到苦味乾魷魚,所以家陣老遠都要入大澳買乾魷魚喔~
仲記得之前有寫過蒸肉餅小貼士,今日同大家重溫吓啦~^
蒸肉餅係一道看似簡單嘅餸菜,點解咁講?? 因為只須將材料及調味料攪勻,跟住攞去蒸就攪掂了,之但係成品有時真係出人意表呢~ 以前我覺得蒸肉餅係好簡單,但見有好多網友都留言查詢,問點解蒸完碟肉餅會成灘水,同埋縮得好細,又或者鬆散唔彈牙~? 
1)肉餅蒸完出好多水,大多數是蒸過火了~ 
2)鬆散唔彈牙,大多數是生粉落唔夠,又或者係攪拌不足及摔撻不足,亦有機會係只用瘦肉而沒有肥肉.肉餅的肥瘦比例為51肥,過少肥肉會影響黏合度及會鞋口~ 但過多也不健康吧~ 肉餅蒸好後,會出現少許收縮,這是正常現象,假若收縮過度而出現一灘水,即代表已過火了~ 只要攪拌足夠及蒸煮時間控制得宜,蒸出爽滑肉餅是一件簡單事了~
上圖肉餅可以睇到有少許收縮,肉餅同碟邊有少許距離而不會一灘水的, 脹卜卜嘅肉餅,一口咬落去好爽彈架,配上鮮香嘅乾魷魚,送飯一流~^0^~ (P.S.:呢味餸係我家二小姐Ruby要求煮嘅,估唔到佢咁細個但口味咁老餅啊~ 哈哈哈~)
《魷魚蒸肉餅食譜》
材料:
免治豬肉碎300
乾魷魚 1隻(走鬚)
(油半茶匙)
醃料:
生抽 3茶匙
薑汁半茶匙
紹酒1茶匙
生粉2茶匙
水份2茶匙
做法:
1)乾魷魚浸軟,撕掉薄膜,切粒,備用。
2)免治豬肉碎加入醃料,順時針方向攪拌至呈黏性後,加入乾魷魚粒,攪拌至呈黏性後,將肉餅摔撻數次,平均置於碟中,表面平均掃上少許生油(約半茶匙)。
3)燒熱一鍋水,大火隔水蒸10分鐘,即成. 
 http://i94.photobucket.com/albums/l109/kellyruby/GIF/line/Rose-052.gif
(我已關閉網誌留言欄,歡迎大家到我的專頁內留言~^0^~)
(我在Facebook開了專頁,方便大家留言,歡迎大家加入閒
話家常啊~)

何師奶 ~《全職"煮"婦生活逸事 烹飪分享》
 
我的微博,請多多關照(注) Haha~http://i206.photobucket.com/albums/bb40/ForYahooBlog/GIF/yausiumi/20090321_0643bd1d76bb3bccba23c4C4pz.gif
Related Posts Plugin for WordPress, Blogger...