麵包機食譜之~ 《自家製菠蘿果醬》(附食譜)

Share

麵包機食譜之~ 《自家製菠蘿果醬》(附食譜) 

早幾日買咗個地門菠蘿，昨晚花成擔心機，將菠蘿去皮起釘，整得佢靚靚仔仔，點知．．．．佢得陣香味，唔夠甜又唔夠酸，嬲得滯將佢要嚟做菠蘿果醬啊~ 
以前我會用明火將佢慢慢煮，楝响爐邊慢慢煮醬，不過有麵包機後，就旨意佢了~ 只須將材料放曬落部機樹，跟手按個掣，1小時20分鐘後，嘟嘟聲就攪掂了，真係懶人恩物來啊~ hahahaaaa~

假若用以下兩款水果食材煮果醬，好少會甩拖的，其一是藍莓，另一款是菠蘿，而士多啤梨有時成品會稀少少，冷藏後會好ｄ，所以我較喜愛製作藍莓/菠蘿果醬啊~

菠蘿我會預先將七成果肉以攪拌機打成蓉，剩吓嗰三成果肉切細件，咁吃起來會見到菠蘿肉，唔會淨係得ｄ醬囉~ 上圖嘅果肉大件咗少少，假若你哋製作時，可以將呢三成果肉再切細件ｄ啊~
下圖係加入糖、檸檬汁、玉桂粉同冧酒(玉桂粉可按個人喜好加入，不加入亦可)

將材料攪勻，然後放入麵包機按果醬模式(mode 9)

因菠蘿的纖維較多，所以會杰身少少，唔怕佢會稀dum dum啊~ 成功率是極高的~ 煮好放涼入樽，放入雪柜普通格即可~

哈~一隻大菠蘿變咗做一大樽菠蘿果醬，可以要嚟搽麵包，又或者加入原味乳酪做甜品，都一樣咁Good架~

《自家製菠蘿果醬》食譜 (麵包機操作)
材料:
新鮮菠蘿750克
糖 250克
檸檬1個半(榨汁)
玉桂粉半茶匙(optional)
冧酒1湯匙 
做法:
1)新鮮菠蘿去皮起釘，去芯切件，將七成果肉以攪拌機打成蓉，剩下三成果肉切細件，備用．
2)將所有材料放入麵包機不黏模內，拌勻，按果醬mode 9，完成後放涼，倒入已消毒的玻璃樽內，置於雪柜普通格冷藏即成．
【小貼士】
緊記要將七成果肉以攪拌機打成蓉，否則煮完有機會不夠濃稠啊~


(我已關閉網誌留言欄，歡迎大家到我的專頁內留言~^0^~)
(我在Facebook開了專頁，方便大家留言，歡迎大家加入閒
話家常啊~)
何師奶 ~《全職"煮"婦生活逸事 烹飪分享》

我的微博，請多多關照(注) Haha~